Жибек Қуламбаева Сербиядаги турнирда россиялик спортчини мағлуб этди
ASTANА. Кazinform – Қозоғистонлик теннисчи, дунёнинг 309-ракеткаси Жибек Қуламбаева Куршумлия-Баня (Сербия) ITF W35 турнирининг 1/8 босқичига чиқди.
Турнирнинг тўртинчи ракетка сифатида таснифланган 25 ёшли теннисчи биринчи босқичда дунё рейтингида 758-ўринни эгаллаб турган россиялик Евгения Бурдинани мағлуб этди.
Жибек 7:5, 6:4 ҳисобида зафар қучди. Шиддатли беллашув 2 соат 6 дақиқа давом этди.
Жибек Қуламбаева чорак финалга чиқиш учун жаҳон рейтингида 487-ўринни эгаллаб турган беларуслик Юлия Готовка билан куч синашади.
Ўтган ҳафтада Куршумлия-Баняда бўлиб ўтган шунга ўхшаш турнирда Ж. Қуламбаева яккалик баҳсларида ярим финалгача етиб, россиялик Алина Чараевага 6:4, 4:6, 1:6 ҳисобида имкониятни бой берган эди.
Қозоғистонлик теннисчи айни дамда WТА Livе рейтингида 306-ўринни эгаллаб турибди. Агар у бўлажак ўйинларини муваффақиятли ўтказса, ТОП-300га кириш имкониятига эга.
Эслатиб ўтамиз, аввалроқ Юлия Путинцева Ролан Гарросда иккинчи босқичга йўл олгани ҳақида хабар берган эдик.
