Ўзбекистонда хусусий боғча ва мактаб ташкилотлари 2030 йилгача барча турдаги солиқлардан озод қилинади
TASHKENT. Kazinform - “Таълим соҳасида хусусий сектор иштирокини ошириш бўйича қўшимча чора-тадбирлар тўғрисида”ги Ўзбекистон Президенти қарори қабул қилинди. Бу ҳақда Kazinform агентлиги Huquqiy axborot Telegram-каналига таяниб хабар беради.
Қарор билан 2030 йил 1 январга қадар нодавлат мактабгача ва умумий ўрта таълим ташкилотлари:
- барча турдаги солиқ (бундан ижтимоий солиқ мустасно) ва йиғимлардан озод қилинади;
- унда меҳнат фаолиятини амалга ошираётган чет эллик ўқитувчи ва мутахассислар жисмоний шахслардан олинадиган даромад солиғи ва ижтимоий солиқ тўламайди.
Шунингдек, 2030 йил 1 январга нодавлат мактабгача ва умумий ўрта таълим ташкилотларининг қуйидаги Ўзбекистон Республикасида ишлаб чиқарилмайдиган товар жиҳозларига божхона тўловлари тўланмайди (божхона расмийлаштируви учун йиғимлар бундан мустасно):
- замонавий ўқув ва лаборатория ускуналари;
- компьютер техникаси ва дастурий маҳсулотлар;
- ўқув ва илмий-методик адабиётлар, анжомлар ва моддий-техник ресурслар.
2025 йил 1 январдан бошлаб:
- нодавлат таълим ташкилотларига доимий жалб этиладиган педагог хорижий мутахассисларга “А-2” ўқитувчилар кириш визаларини бериш йўлга қўйилади;
- давлат ва нодавлат таълим ташкилотлари томонидан хориждан жалб қилинган мутахассисларга меҳнат қилиш ҳуқуқини берувчи тасдиқнома бериш йиғим миқдори БҲМнинг 30 бараваридан 1 бараваригача камайтирилади.
Эслатиб ўтамиз, Ўзбекистон хорижда истиқомат қилаётган ватандошларига бир қатор ҳуқуқ ва имтиёзлар бераётгани ҳақида хабар берган эдик.
