Туркия суриялик қочқинларнинг уйларига хавфсиз қайтишига ёрдам беради — ТИВ
ASTANA. Kazinform - Туркия томони Туркияда истиқомат қилаётган суриялик қочқинларнинг эсон-омон қайтиши учун барча имкониятларни ишга солади. Бу ҳақда душанба куни мамлакат ташқи ишлар вазири Ҳоқон Фидан маълум қилди, деб ёзади Xinhua.
— Уларнинг хавфсиз ва муносиб қайтишини таъминлаш учун барча имкониятларни ишга соламиз, - деди Ҳ.Фидан Туркия пойтахти Анқара шаҳрида бўлиб ўтган Элчиларнинг 15-конференциясидаги нутқида.
Унинг айтишича, Туркия Суриянинг ҳудудий яхлитлиги ва барқарорлигини таъминлаш бўйича барча манфаатдор томонлар билан саъй-ҳаракатларни қўллаб-қувватлаш ва мувофиқлаштиришга тайёр.
Шунингдек, душанба куни Истанбулда жойлашган Hurriyet Daily News газетасининг хабар беришича, ватанига қайтишни истаган суриялик қочқинлар Хатай провинцияси жануби-шарқидаги Рейҳонли туманидаги Туркия-Сурия чегарасидаги назорат-ўтказиш пунктида божхонадан ўтиш учун навбатга туришган.
— Чегара ўтказиш пунктида одамларнинг ҳаддан ташқари гавжум бўлишининг олдини олиш мақсадида жандармерия чегарадан 5 километр узоқликда қўшимча назорат-ўтказиш пункти ўрнатди, — дейилади хабарда.
Жаҳон соғлиқни сақлаш ташкилоти маълумотларига кўра, Туркияга 3,5 миллиондан ортиқ суриялик келган.
Эслатиб ўтамиз, Суриянинг айрим шаҳарларида комендантлик соати жорий этилди.
