Нигердаги исёнчилар ҳокимиятдан ағдарилган президентни ўлдириш билан таҳдид қилишди
NIAMEY. Кazinform – Ғарбий Африка давлатлари иқтисодий ҳамжамияти (ЭКОВАС) Нигер чегараси яқинида захира қўшинларини қўшишни талаб қилди. Ҳамжамият конституциявий тузум тикланишига тўсқинлик қилаётган шахсларнинг чегараларни ёпиш, саёҳатларини қатъий тақиқлаш ва активларини музлатиш чораларини кўришини маълум қилди, дея хабар беради Кazinform Euronews.cоmга таяниб.
Аввалроқ Нигерда ҳокимиятни қўлга олган исёнчилар қўшни давлатлар ҳарбий аралашуви юз берса, ҳокимиятдан ағдарилган президент Муҳаммад Базумни ўлдириш билан таҳдид қилган эди.
Ғарб ахборот агентликлари хабарига кўра, исён ташкилотчилари 7 август куни Нигерга келган АҚШ давлат котибининг биринчи ўринбосари Виктория Нуландга шундай огоҳлантириш берган. У мамлакатда демократик тартибни тиклаш йўлини таклиф қилди, бироқ исёнчилар «умуман қизиқиш билдирмади».
Эслатиб ўтамиз, Нигердаги ҳарбийлар миллий телевидение орқали президент Муҳаммад Базумни ҳокимиятдан четлатилганини маълум қилган эди.
Улар, шунингдек, конституция ва барча давлат институтлари фаолияти тўхтатилиши ва мамлакатнинг Ғарбий Африкадаги чегаралари ёпилишини эълон қилди. Генерал-полковник Амаду Абдураҳмон телевизорда гапирди.
«Биз, мудофаа ва хавфсизлик кучлари, сиз билган режимни ағдаришга аҳд қилдик», - деди генерал телевидение орқали қилган чиқишида. - Бу хавфсизлик вазиятининг ёмонлашиши, иқтисодий ва ижтимоий бошқарувнинг таназзулга учраши туфайли қабул қилинган қарор. Унга кўра, вазирликлар раҳбарлари кундалик вазифаларини бажаришда давом этмоқда.
Биз барча ташқи ҳамкорлардан масалага аралашмасликларини сўраймиз. Денгиз ва ҳаво чегаралари вазият барқарорлашгунча ёпилади», - деди у.
Африканинг Нигер давлатида рўй бераётган воқеалар жаҳон оммавий ахборот воситаларининг диққат марказида. Кўтарилган қизиқиш Нигернинг Европа Иттифоқи томонидан импорт қилинадиган катта уран заҳиралари, шунингдек, Саҳел минтақасидаги умумий хавфсизлик ҳолати билан боғлиқ. Батафсил Kazinform ХАА таҳлилий материалида ўқиш мумкин.
