Қозоғистонда экспорт-кредит агентлиги ташкил этилиши мумкин
NUR-SULTAN. Кazinform – Савдо ва интеграция вазирлиги «Экспорт-кредит агентлиги тўғрисида»ги қонун лойиҳасини ишлаб чиқди. Муҳокамалардан сўнг ҳужжат кўриб чиқиш учун Парламент Мажилисига юборилиши режалаштирилган, деб хабар беради Кazinform мухбири.
«Қонун лойиҳасида экспорт-кредит агентлигининг ҳуқуқий мақоми, фаолият юритиш тартиби, мақсади, вазифалари ва ваколатлари, унинг маҳаллий нохом ашё экспортини ривожлантириш ва рағбатлантириш соҳасида давлат органлари, тадбиркорлик субъектлари билан ўзаро ҳамкорлиги белгилаб берилган», — дейилади вазирлик тақдим этган қонун лойиҳасида.
Ҳужжатга мувофиқ, экспорт-кредит агентлиги қуйидаги вазифаларни бажаради:
- маҳаллий экспортчилар ва хорижий харидорлар томонидан амалга ошириладиган экспорт операцияларини ихтиёрий суғурта қилиш йўли билан нохомашё товарлар (ишлар, хизматлар) экспортини рағбатлантириш;
- иккинчи даражали банклар ва молия ташкилотлари, Қозоғистон Тараққиёт банки, саноатни ривожлантириш жамғармаси, маҳаллий экспортчилар ва уларнинг нохомашё товарларини сотиб олган хорижий харидорларни молиялаштиришда таваккалчиликларини суғурта қилиш орқали экспортни молиялаштиришни таъминлаш;
- маҳаллий экспортчиларни молиявий қўллаб-қувватлашни кенгайтириш мақсадида Қозоғистон ва хорижий суғурта ташкилотларига, бошқа экспорт-кредит агентликларига ихтиёрий суғурта шартномалари бўйича хатарларни қабул қилиш ва қайта суғурталаш;
- маҳаллий экспортчиларга, импорт қилувчиларга ёки молия ташкилотларига, хорижий контрагентларга, нохомашё товарларнинг мижозларига экспорт операциялари бўйича кафолатлар бериш;
- экспортни олдиндан молиялаштириш мақсадида иккинчи даражали банклар ва молия институтларига пул маблағларини шартли жойлаштириш йўли билан нохомашё товарлар экспортини рағбатлантириш;
- инвестициялаш мамлакат ҳудудида инвестицияларни амалга оширувчи Қозоғистон Республикаси резидентларининг инвестицияларини суғурталаш;
- маҳаллий экспортчиларнинг рақобатбардошлигини ошириш мақсадида нохомашё товарларни экспорт қилишда уларга хизмат кўрсатиш ва ахборот ёрдамини кўрсатиш;
- республика иқтисодиётини барқарор ривожлантиришга кўмаклашувчи саноат-инновацион лойиҳалар ва бошқа вазифаларни амалга оширишда иштирок этиш.
Режага кўра, экспорт-кредит агентлиги ташқи бозор таҳлилини ўтказиш, кредит ва лизинг операциялари асосида тақдим этилган фоиз ставкасини субсидиялаш функцияларини амалга оширади. Бундан ташқари, ташкил этилиши мумкин бўлган ташкилот нохомашё маҳаллий товарларни сотиб олишга тайёр бўлган хорижий компанияларни қидиради ва жалб қилади. Бироқ, янги қонунга кўра, экспорт-кредит агентлигига тадбиркорлик фаолияти сифатида операцияларни ташкил этиш ва операцияларни амалга ошириш тақиқланади.
Қонун лойиҳаси 22 сентябргача муҳокама учун очиқ. Кейинчалик у Парламент қуйи палатасига юборилади.
Муаллиф: Алихан Асқар
