Ҳиндистонлик фирибгар келин етти ойда 25 эркакка турмушга чиққан
ASTANA. Kazinform – Ҳиндистонда 23 ёшли Анурадху Пасван никоҳда фирибгарлик содир этганликда гумонланиб ҳибсга олинди. У етти ой ичида турли штатларда 25 эркакка турмушга чиқди, деб ёзади The Economic Times.
Кўплаб фирибгарлик ҳолатларида иштирок этган келин “жонли тузоқ” усулида қўлга олинди – полициячилардан бири бошқа куёв ролини ўйнаган.
Дастлабки маълумотларга кўра, турмуш ўртоғи билан ажрашган Пасван бошқа шаҳарга кўчиб ўтган ва жиноий гуруҳга қўшилган. У WhatsApp каби турли платформалар орқали ишлайдиган агентликлар орқали ҳаракат қилган. Бундай агентликлар эркаклар учун келинларни топишга ваъда беришади.
Пасваннинг келин бўлиш схемаси оддий эди: у турмушга чиқиб, бир неча кундан кейин пул, тилла тақинчоқлар, маиший техникаларни олиб қочиб кетарди.
Фирибгарлик схемаси 3 май куни Вишну Шарма исмли фуқаронинг шикоятидан сўнг фош этилди. Пасван унга 20 апрель куни турмушга чиқди ва 2 май куни у уйдан қимматбаҳо нарсаларни олиб, ғойиб бўлди.
Эслатиб ўтамиз, аввалроқ Гонконгдаги гўзаллик танлови ғолиби фирибгарликда айбланиб судлангани ҳақида хабар берган эдик.
