2027 йилда Қозоғистонда водород билан ҳаракатланувчи поездлар пайдо бўлиши мумкин
“Қозоғистон темирйўли” миллий компанияси 2027 йилдан бошлаб водород тепловозларини сотиб олишни режалаштирмоқда. Шу тариқа улар логистика компаниялари олдида ўзларининг экологик имиджини яхшилайди, деб хабар беради Kazinform мухбири.
“Янги ипак йўли” халқаро транспорт-логистика бизнес-форумида акциядорлик жамияти бошқаруви раиси Нурлан Сауранбаев шундай маълумот берди.
“Атроф-муҳитга ҳаво ва денгиз транспортига қараганда 8 баробар камроқ зарарли чиқиндилар чиқаришига қарамай, темир йўл соҳасида такомиллаштириш зарур бўлган соҳалар кўп. 2027 йилдан “Қозоғистон темир йўллари” яшил водородда ҳаракатланувчи локомотивларни сотиб олишни бошлайди.
Яъни, локомотив паркимиз яшил энергияга устувор аҳамият беради. Унгача газда ҳаракатланувчи локомотивлар сотиб олмоқчимиз. Илгари бу борада шартномалар имзолаган эдик. Газ ҳам яшил технология ҳисобланади. Яъни логистика соҳасига яшил технология кириб келмоқда. Йирик компаниялар билан музокаралар олиб борилганда, бир тонна юк учун чиқиндилар миқдори лойиҳа қиймати билан бирга аниқ ёзилади. Барча йирик компаниялар логистика маҳсулотларини сотишда углерод изларини кўрсатишлари керак. Бу вақт тартиби”, – деди у.
Компания раҳбарининг айтишича, Қозоғистон ҳудуди орқали юк ташмоқчи бўлган йирик компаниялар онлайн назорат тизимининг номукаммаллигидан хавотирда.
“Рақамлаштириш саноатимиз учун ҳам муҳим. Шунинг учун биз бундай технологияларни тақдим этувчи дунёдаги энг йирик компаниялар билан ҳамкорлик қилмоқдамиз. Биз Озарбайжон, Грузия ва Ўзбекистон билан ушбу рақамли коридорни изчил яратиш бўйича келишув тузмоқдамиз”, – дейди Нурлан Сауранбаев.
Дунёда транспорт занжирининг бузилиши “Қозоғистон темирйўли” учун қулай шароит яратган кўринади.
“Кейинги уч йил ичида биз тарихий кўрсаткичларни рўйхатга олдик. Яъни, биз ҳар йили Қозоғистон темир йўлининг энг юқори кўрсаткичларини янгилаб борамиз. Бу йил ҳам шундай бўлади шекилли. 9 ой якунларига кўра юк айланмаси 7 фоизга ошди. Асосий ўсиш транзит билан боғлиқ. Тарнзитнинг ўз ўсиши 25 фоизни ташкил қилади. Бу жуда яхши кўрсаткич ва Қозоғистон транзит давлатга айланганидан далолат беради”, – дейди компания раҳбари.
Эслатиб ўтамиз, ҚР Президенти Қасим-Жомарт Тоқаевнинг АҚШга ташрифи доирасида “Қозоғистон темирйўли” МК” акциядорлик жамияти ва Wabtec ўртасида стратегик ҳамкорлик тўғрисидаги келишув имзоланган эди.
“Астана” халқаро молия маркази менежери Ренат Бектуровнинг сўзларига кўра, Американинг локомотив ишлаб чиқарувчи компанияси Citibank молиялаштирган ҳолда мамлакатда 240 та янги локомотив қуради. Битим қиймати 900 миллион долларни ташкил этади.
Шартнома "Қозоғистон темирйўли" компанияси локомотивларининг қарийб 15 фоизини янгилаш имконини беради.
Муаллиф: Есимжан Нақтибай
